अत्तरिया चोकको रात्रीकालीन आकर्षण : रमाइलोसँगै सावधानी अपरिहार्य

सुदूरपश्चिम प्रदेशको गोदावरी नगरपालिकाको मुटुमा रहेको अत्तरिया चोक पछिल्ला वर्षहरूमा रात्रीकालीन सौन्दर्यको प्रतीक बनेको छ। झिलमिल बत्तीले सजिएको चोक, वरिपरिका रंगीन सजावट र खुला वातावरणले यहाँ आउने जोकोहीलाई मोहित बनाउँछ। विशेषगरी बेलुकीपछिको समय साना बालबालिकादेखि लिएर युवा र वृद्धसम्मका मानिसहरूलाई आकर्षित गर्ने गर्दछ।

यस सुन्दर चोकमा फोटो खिच्ने, टिकटक भिडियो बनाउने र सामाजिक सञ्जालका लागि रमाइला क्षण कैद गर्नेको भीड बढ्दो छ। पर्यटक र स्थानीय दुवैका लागि यो स्थान रमाउने उत्कृष्ट गन्तव्यको रूपमा स्थापित हुँदै गएको छ। धेरैका लागि यो केवल बजारको बीचको चोक मात्र नभई सम्झनामा बस्ने दृश्यहरूको संग्रहालयजस्तै भएको छ।

तर, यो रमाइलोसँगै केही चुनौतीहरू पनि देखापरेका छन्। रात्री समयमा यहाँ भीड बाक्लो हुने भएकाले सडक पार गर्नेहरू जथाभावी बाटो काट्ने, फोटो खिच्ने क्रममा सडकमा उभिने वा सवारी साधनको बाटोमा रोकिँने जस्ता क्रियाकलाप बढेका छन्। यसले आवतजावत गर्ने सवारी साधनलाई असहज बनाउने मात्र होइन, दुर्घटनाको सम्भावना पनि उच्च बनाइरहेको छ।

यातायात प्रहरी र स्थानीय सरोकारवालाले रमाइलो गतिविधि स्वयंमा राम्रो भए पनि यसलाई सुरक्षित ढंगले गर्नुपर्नेमा जोड दिएका छन्। रमाइलोमा रम्ने, फोटो खिच्ने वा टिकटक बनाउने कुरा गलत होइन, तर सावधानी नअपनाइए रमाइलो क्षण दुर्घटनामा बदलिन सक्छ।

अत्तरिया बजारको सुन्दरताले पर्यटकलाई तानिरहँदा यहाँको सुरक्षा र व्यवस्थापनमा पनि ध्यान दिन आवश्यक छ। सबैले आफ्नो र अरूको सुरक्षालाई प्राथमिकता दिँदै सजग भएर रमाइलो गर्न सकेमा अत्तरिया चोक सधैं उज्यालो र खुशीको प्रतीक बनेर रहन सक्नेछ।